Laurdag 3. november opnar Volda og Ørsta Kunstlag ny salsutstilling. Denne gongen har Kunstlaget gleda av å presentere den kjende biletkunstnaren Elisabeth Werp. Under tittelen «Vandreren» fyller ho Kunsthuset med maleri og grafikk.
Utstillinga heng oppe til og med 1. desember.

OPNING:

Laurdag 3. november kl. 13.00 (ope til kl. 16.00)

OPNINGSTIDER:

Torsdag-laurdag 12.00 – 16.00

Salsutstilling – fri inngang

Elisabeth Werp bur og arbeider i Oslo. Ho er utdanna ved Statens Håndverks- og kunstindustriskole (1984–88) og Statens Kunstakademi (1988–92), og studerte i tillegg i Paris og Firenze (1993–94). Elisabeth Werp hadde si første separatutstilling i 1991 og har seinare stilt ut i Kunstnerforbundet, på Høstutstillingen, Henie Onstad Kunstsenter, Blaafarveværket, Stenersenmuseet og elles på mange galleri rundt i landet. Ho har også hatt fleire store utstillinger i utlandet; i Paris, Salzburg, Firenze, Seattle, Miami og London.
I 2014 mottok Elisabeth Werp Aksel Waldemar-prisen som årets biletkunstnar.